ರಾಯಬಾಗ ತಾಲೂಕ 6 ನೇ ಕನ್ನಡ ಸಾಹಿತ್ಯ ಸಮ್ಮೇಳನದ ಸರ್ವಾಧ್ಯಕ್ಷರು ಗಿ ಆಯ್ಕೆಯಾಗಿರುವ ಶ್ರೀ ಡಿ ಎಸ್ ನಾಯಿಕ ರವರ ಕಿರು ಪರಿಚಯ.

by Gadi Nudi | Jan 19, 2023 | Uncategorized, ಕನ್ನಡ ನಾಡು ನುಡಿ

*ಧರ್ಮಪಥದ ಮೇಲೆ ಸರ್ವಾಧ್ಯಕ್ಷತೆಯ ಹೊಂಬೆಳಕು.

*

*ಶ್ರೀ ಡಿ ಎಸ್ ನಾಯಿಕ*

ಹಿತಮಿತ ಮಧ್ಯಮ ಎತ್ತರದ ನಿಲುವಿನ ಶ್ವೇತಗನ್ನಡಿಯಂತಿರುವ ಧರ್ಮಣ್ಣ ಸಿದ್ದಪ್ಪ ನಾಯಿಕರು ಬಿಳಿ ಅಂಗಿˌಪೈಜಾಮ ಧರಿಸಿ ನಿಂತರೆಂದರೆ ನೋಡಿದವರ ಮನದ ತುಂಬಾ ಭಕ್ತಿಬೆಳದಿಂಗಳು ಸುರಿಯುವುದು. ಬೆಳಗಾವಿ ಜಿಲ್ಲೆಯ ರಾಯಬಾಗ ತಾಲೂಕಿನ ಮೊರಬ ಗ್ರಾಮದಲ್ಲಿ  29-3-1941 ರಂದು ಸಿದ್ದಪ್ಪˌ ಬಾಗವ್ವರ ಪುಣ್ಯ ಉದರದಲ್ಲಿ ಜನಿಸಿದ ಡಿ.ಎಸ್.ನಾಯಿಕರು ಸಾಮಾನ್ಯನಾಗಿ ಹುಟ್ಟಿ ತ್ರಿವಿಕ್ರಮನಂತೆ ಬೆಳೆದ ಪರಿ ಬೆರಗು ಹುಟ್ಟಿಸುತ್ತದೆ. ಬಾಗೆನಾಡಿನ ಸರ್ವಧರ್ಮಧ್ವಜದಂತಿರುವ ನಾಯಿಕರು ಸರಳತೆˌವಾಗ್ಮಿತೆˌಪ್ರಾಮಾಣಿಕತೆˌವಿನಯತೆˌಸಹಜತೆಗಳ ಅಪೂರ್ವ ಸಂಗಮವಾಗಿದ್ದಾರೆ. ಜನಾನುರಾಗಿಯಾಗಿ ಜನಮೆಚ್ಚಿದ ನಾಯಕರಾಗಿ  ಹೊರಹೊಮ್ಮಿ ಗೊಮ್ಮಟವಾಗಿ ತೋರುಬೆರಳಾಗಿದ್ದಾರೆ.

‘ಡಿಪ್ಲೋಮಾ ಇನ್ ಕೋಆಪರೇಶನ್ ‘ಕೋರ್ಸ ಮುಗಿಸಿ ಕುಡಚಿಯಲ್ಲಿ 1962 ರಿಂದ 1969 ರವರೆಗೆ ಗುಮಾಸ್ತರಾಗಿ ಸೇವೆ ಸಲ್ಲಿಸಿದ್ದಾರೆ.1969 ರಿಂದ ಸಮಾಜ ಸೇವೆಯನ್ನು ತಮ್ಮ ಉಸಿರಾಗಿಸಿಕೊಂಡು ಸಾಂಸ್ಕೃತಿಕˌಸಾಮಾಜಿಕˌಶೈಕ್ಷಣಿಕˌಧಾರ್ಮಿಕˌಸಾಹಿತ್ಯಿಕ ಕ್ಷೇತ್ರಗಳಲ್ಲಿ ತಮ್ಮನ್ನು ತಾವು ತೊಡಗಿಸಿಕೊಂಡು ರಾಯಬಾಗ ತಾಲೂಕಿನ ಜಾತ್ಯಾತೀತˌಪ್ರಶ್ನಾತೀತ ನೇತಾರರಾಗಿ ಜನಮನದಲ್ಲಿ ಪೂಜಿಸಲ್ಪಡುತ್ತಿದ್ದಾರೆ.

1978 ರಲ್ಲಿ ಮೊರಬ ಗ್ರಾಮ ಪಂಚಾಯತ ಅಧ್ಯಕ್ಷರಾಗಿ ಕೈಗೊಂಡ ಕಾರ್ಯಗಳು ಅವಿಸ್ಮರಣೀಯ.1973 ರಲ್ಲಿ ಉಪಾಧ್ಯಕ್ಷರಾಗಿ ಗಣನೀಯ ಸೇವೆ ಸಲ್ಲಿಸಿದ್ದಾರೆ.ಸಾರ್ವಜನಿಕ ಬದುಕಿನಲ್ಲಿ ಶ್ರಮದಾನದ ಮೂಲಕ ರಸ್ತೆ ನಿರ್ಮಾಣ ಮಾಡಿ  ಐತಿಹಾಸಿಕ ದಾಖಲೆ ಬರೆದಿದ್ದಾರೆ.1981 ರಲ್ಲಿ ಮೊರಬದಲ್ಲಿ ಸಂತೆ ಆರಂಭಿಸಿ ಆರ್ಥಿಕ ವಹಿವಾಟಿಗೆ ಶ್ರೀಕಾರ ಹಾಕಿದ ಡಿ.ಎಸ್ ಅವರು 1982 ರಲ್ಲಿ ಸರಕಾರಿ ಪ್ರೌಢ ಶಾಲೆ ಮಂಜೂರು ಮಾಡಿಸಲು ಹಗಲಿರುಳು ಶ್ರಮಿಸಿ ಯಶಸ್ವಿಯಾದುದು ಇವರ ಶಿಕ್ಷಣ ಪ್ರೇಮಕ್ಕೆ ರನ್ನಗನ್ನಡಿಯಾಗಿದೆ.ಅದೇ ವರ್ಷ ಪ್ರಾಥಮಿಕ ಆರೋಗ್ಯ ಕೇಂದ್ರ ಮಂಜೂರು ಮಾಡಿಸಿ ಗ್ರಾಮಕ್ಕೆ ಆರೋಗ್ಯ ಭಾಗ್ಯ ನೀಡಿದ ಭಾಗ್ಯವಿಧಾತರಾಗಿದ್ದಾರೆ.1983 ರಲ್ಲಿ ಸರಕಾರಿ ಪಶು ಆಸ್ಪತ್ರೆ ಆರಂಭಿಸುವುದರ ಮೂಲಕ ಗ್ರಾಮದ ಅಭಿವೃದ್ದಿಯ ಚಕ್ರದ ವೇಗ ಹೆಚ್ಚಿಸಿ ಆಧುನಿಕ ಮೊರಬದ ಶಿಲ್ಪಿಯೆನಿಸಿದ್ದಾರೆ.

ಆದರ್ಶಗಳ ಆಕರವಾಗಿರುವ ಡಿ.ಎಸ್.ನಾಯಿಕರವರು 1985 ರಿಂದ ಹಲವು ವರ್ಷಗಳವರೆಗೆ ರೇಡಿಯೋ ಕೇಂದ್ರದಲ್ಲಿ ಭಾಷಣˌಚಿಂತನಗಳನ್ನು ಮಾಡಿ ಶ್ರೋತೃಗಳಿಂದ ಸೈ ಎನಿಸಿಕೊಂಡಿದ್ದಾರೆ.1992 ರಲ್ಲಿ ಆಕಾಶವಾಣಿ ಧಾರವಾಡ ಕೇಂದ್ರದ ಸಲಹಾ ಸಮಿತಿ ಸದಸ್ಯರಾಗಿ ಅನನ್ಯ ಸೇವೆ ಸಲ್ಲಿಸಿದ್ದಾರೆ.ಸಾಹಿತ್ಯೋಪಾಸಕ ಡಿ.ಎಸ್.ನಾಯಿಕರವರು ರಾಯಬಾಗ ತಾಲೂಕು ಕನ್ನಡ ಸಾಹಿತ್ಯ ಪರಿಷತ್ತಿನ ಕಾರ್ಯದರ್ಶಿಗಳಾಗಿ ಗಮನಾರ್ಹ ಕಾರ್ಯಗೈದಿದ್ದಾರೆ.2000 ದಿಂದ 2005 ರವರೆಗೆ ಬೆಳಗಾವಿ ಜಿಲ್ಲಾ ಪಂಚಾಯತ ಸದಸ್ಯರಾಗಿ ಸೇವೆ ಸಲ್ಲಿಸಿ ಸಾರ್ವಜನಿಕರಿಂದ ಮೆಚ್ಚುಗೆ ಗಳಿಸಿದ್ದಾರೆ.1979 ರಿಂದ ರಾಯಬಾಗತಾಲೂಕು ಭೂನ್ಯಾಯ ಮಂಡಳಿ ಸದಸ್ಯರಾಗಿ ಸೇವೆ ಸಲ್ಲಿಸಿ ಭೂನ್ಯಾಯ ಮಂಡಳಿ ಗೌರವ ಹೆಚ್ಚಿಸಿದ್ದಾರೆ.ತಾಲೂಕು ಮಟ್ಟದ ಡಾ.ಅಂಬೇಡ್ಕರ ಜಯಂತಿˌಶಿಕ್ಷಕರ ದಿನಾಚರಣೆ ಕಾರ್ಯಕ್ರಮಗಳಲ್ಲಿ ಮುಖ್ಯ ಅತಿಥಿಗಳಾಗಿ ಭಾಗವಹಿಸಿ ಕಾರ್ಯಕ್ರಮಗಳನ್ನು ಗೆಲ್ಲಿಸಿದ್ದಾರೆ.ಪ.ಪೂ ಶ್ರೀ ಸಿದ್ಧೇಶ್ವರ ಸ್ವಾಮಿಗಳು ವಿಜಯಪುರರವರ ಶಿಷ್ಯರಾಗಿ ಅಧ್ಯಾತ್ಮಿಕ ಕಾರ್ಯಕ್ರಮಗಳಲ್ಲಿ ಭಾಗಿಯಾಗಿ ಅನೇಕ ಪ್ರವಚನ ಕಾರ್ಯಕ್ರಮಗಳನ್ನು ನೀಡಿ ಆನಂದಿಸಿದ್ದಾರೆ.

‘ಮೊರಬದ ಪುಣ್ಯದ ಕೆನೆ’ˌ’ಧರ್ಮವೀರ’ ಧರ್ಮಣ್ಣ ಸಿದ್ದಪ್ಪ ನಾಯಿಕರು ಮೃದು ಮಾತಿನ ಹೂಹೃದಯದ ಸಜ್ಜನ ಶಕ್ತಿಕೇಂದ್ರವಾಗಿದ್ದಾರೆ.ಬಡವರˌಶೋಷಿತರˌನೊಂದವರ ಧ್ವನಿಯಾಗಿ ಸಮಾಜದ ಸಂಪತ್ತಾಗಿದ್ದಾರೆ.ಜನರ ನಡುವಿನಿಂದ ಅರಳಿದ ಅಸಲಿ ನಾಯಕ ನಾಯಿಕರವರು ಅಜಾತ ಶತ್ರುಗಳಾಗಿ ಧರ್ಮಣ್ಣ ಹೆಸರಿಗೆ ಅನ್ವರ್ಥಕರಾಗಿದ್ದಾರೆ.

ಅಮೃತದ ಅಕ್ಷಯ ಕುಂಭವಾಗಿರುವ ಡಿ.ಎಸ್.ನಾಯಿಕರವರು ನಡೆದಾಡುವ ಭಾವೈಕ್ಯದ ಬಾವುಟವಾಗಿದ್ದಾರೆ.ಸಮಾಜದ ಕೆಲಸಗಳಿಗೆ ಸದಾ ಮುಂದಾಗುವ  ಮುಂದಾಳು ಧರ್ಮಣ್ಣ ನಾಯಿಕರು ನಾಯಕರ ನಾಯಕ ಮಹಾನಾಯಕರಾಗಿ ಕಂಗೊಳಿಸುತ್ತಿದ್ದಾರೆ.ಅವರು ನಡೆದು ಬಂದ ಧರ್ಮಪಥ ಎಲ್ಲರಿಗೂ ಮಾದರಿ.ಧರ್ಮದಾರಿಯ ಚತುಷ್ಪಥವೆನಿಸಿದ ಇವರು ಯುವಕರಿಗೆ ದಾರಿದೀಪವಾಗಿದ್ದಾರೆ.ಆರೋಗ್ಯಕರ ಸಮಾಜದ ನಿರ್ಮಾಪಕ ಡಿ.ಎಸ್.ನಾಯಿಕರವರು ಮೌಲ್ಯಗಳ ಮಹಾ ಉಪಾಸಕರುˌಸಾಹಿತ್ಯಾರಾಧಕರುˌಸಂಸ್ಕೃತಿ ಅರ್ಚಕರಾಗಿ ರಾಯಬಾಗದ ಸಾಂಸ್ಕೃತಿಕ ರಾಯಭಾರಿಗಳಾಗಿದ್ದಾರೆ.ಅವರಿಗೆ ಪರಮಾನಂದವಾಡಿಯಲ್ಲಿ ಜರುಗಲಿರುವ ರಾಯಬಾಗ ತಾಲೂಕಾ ಆರನೆಯ ಕನ್ನಡ ಸಾಹಿತ್ಯ ಸಮ್ಮೆಳನದ ಸರ್ವಾಧ್ಯಕ್ಷ ಪದವಿ ಅರಸಿ ಬಂದಿರುವುದು ತಾಲೂಕಿನಾದ್ಯಂತ ಅಭಿಮಾನಿಗಳಿಂದ ಅಭಿನಂದನೆಗಳ ಮಹಾಪೂರ ಹರಿದುಬರುತ್ತಿದೆ. ಎಲ್ಲೆಡೆ ಸಂತಸ ಗೂಡು ಕಟ್ಟಿದೆ.ಆನಂದದ ಅಲೆಗಳು ಕನ್ನಡ ಕಸ್ತೂರಿಯ ಪರಿಮಳ ಆಸ್ವಾದಿಸಲು ತುದಿಗಾಲ ಮೇಲೆ ನಿಂತಿರುವುದು ಸರ್ವವೇದ್ಯ .ಮೊರಬದ ಮೊಹರು ಡಿ.ಎಸ್.ನಾಯಿಕರವರ ನಿರ್ಮಲ ಚಿತ್ತˌಸಮಾಜ ಕಳಕಳಿˌಬಹುಮುಖ ಕಾಯಕಕ್ಕೆ ರಾಯಬಾಗ ತಾಲೂಕಾ 6 ನೆಯ ಕನ್ನಡ ಸಾಹಿತ್ಯ ಸಮ್ಮೇಳನದ ಸರ್ವಾಧ್ಯಕ್ಷ ಪಟ್ಟದ ಗೌರವ ದೊರಕಿದೆ .

ಅವರಿಗೆ ಹಾರ್ದಿಕ ಹಾರ್ದಿಕ ಅಭಿನಂದನೆಗಳು.

:- ರವೀಂದ್ರ ಮ ಪಾಟೀಲ

ಅಧ್ಯಕ್ಷರುˌಕ.ಸಾ.ಪˌರಾಯಬಾಗ

ರಾಜ್ಯೋತ್ಸವ ಪ್ರಶಸ್ತಿ ಮೊತ್ತ 5 ಲಕ್ಷ ರೂ.ಗಳಿಗೆ ಹೆಚ್ಚಳ : ಬೊಮ್ಮಾಯಿ

by Gadi Nudi | Nov 4, 2021 | Uncategorized, ಕನ್ನಡ ನಾಡು ನುಡಿ

ರಾಜ್ಯೋತ್ಸವ ಪ್ರಶಸ್ತಿ ಮೊತ್ತ 5 ಲಕ್ಷ ರೂ.ಗಳಿಗೆ ಹೆಚ್ಚಳ : ಬೊಮ್ಮಾಯಿ

ಮುಂದಿನ ವರ್ಷದಿಂದ ಅರ್ಜಿ ಪಡೆದು ರಾಜ್ಯೋತ್ಸವ ಪ್ರಶಸ್ತಿ ನೀಡುವುದಿಲ್ಲ

ರಾಜ್ಯೋತ್ಸವ ಪ್ರಶಸ್ತಿ ಮೊತ್ತ 5 ಲಕ್ಷ ರೂ.ಗಳಿಗೆ ಹೆಚ್ಚಳ :

ಸಿಎಂ ಬಸವರಾಜ ಬೊಮ್ಮಾಯಿ ಘೋಷಣೆ

ಬೆಂಗಳೂರು: ಮುಂದಿನ ವರ್ಷದಿಂದ ರಾಜ್ಯೋತ್ಸವ ಪ್ರಶಸ್ತಿಯನ್ನು ಅರ್ಜಿ ಪಡೆದು ನೀಡಲಾಗುವುದಿಲ್ಲ. ಅದರ ಜತೆ

ರಾಜ್ಯೋತ್ಸವ ಪ್ರಶಸ್ತಿಯ ಮೊತ್ತವನ್ನು 5 ಲಕ್ಷ ರೂ.ಗಳಿಗೆ ಹೆಚ್ಚಿಸಲಾಗುವುದು ಎಂದು ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ರಾಜ್ಯೋತ್ಸವ ಪ್ರಶಸ್ತಿ   ಪ್ರದಾನ  ಸಮಾರಂಭದಲ್ಲಿ ಘೋಷಿಸಿದರು.

ಅವರು ಇಂದು ರವೀಂದ್ರ ಕಲಾ ಕ್ಷೇತ್ರದಲ್ಲಿ ಆಯೋಜಿಸಿದ್ದ ರಾಜ್ಯೋತ್ಸವ ಪ್ರಶಸ್ತಿ ಪ್ರದಾನ  ಸಮಾರಂಭ – 2021ದಲ್ಲಿ ಪ್ರಶಸ್ತಿಗಳನ್ನು ಪ್ರದಾನ ಮಾಡಿ ಮಾತನಾಡುತ್ತಿದ್ದರು.

ರಾಜ್ಯೋತ್ಸವ ಈ ಪ್ರಶಸ್ತಿಯ ಮೌಲ್ಯ ಹೆಚ್ಚಬೇಕು.  ಹಣದ ಮೊತ್ತ ಇಲ್ಲಿ ಮಹತ್ವದ್ದಲ್ಲ. ಆದರೆ ಸರ್ಕಾರವೇ  ಪ್ರಶಸ್ತಿಎ ಅರ್ಹರನ್ನು ಗುರುತಿಸುತ್ತದೆ. ಎರಡು ತಿಂಗಳಿಗಿಂತ ಮುಂಚಿತವಾಗಿ ಆಯ್ಕೆ ಸಮೀತಿ ಸಾಧಕರನ್ನು ಪಟ್ಟಿ ಮಾಡುತ್ತದೆ. ನಂತರ ಸರ್ಕಾರವೇ ಸಾಧಕರ ನ್ನು ಅಯ್ಕೆ ಮಾಡಿ ಪ್ರಶಸ್ತಿ ನೀಡುತ್ತದೆ. ಇಂಥ ವ್ಯವಸ್ಥೆ ಜಾರಿಗೆ ಬರಲಿದೆ   ಎಂದರು.

ಸರ್ಕಾರವೇ ಅರ್ಹರನ್ನು ಗುರುತಿಸಿದಾಗ ಪ್ರಶಸ್ತಿಯ ಮೌಲ್ಯ ನೂರು ಪಟ್ಟು ಹೆಚ್ಚುತ್ತದೆ.

ಪ್ರಶಸ್ತಿ ಪಡೆಯುವವರ ನೋವು, ಅದರ ಹಿಂದಿರುವ ಕಠಿಣ ಪರಿಶ್ರಮವನ್ನು ಗುರುತಿಸಿ, ಸಮಾಜದಲ್ಲಿ  ಸಾಧಕರಿಗೆ ಯಾವುದೇ ಕಷ್ಟವಾಗಬಾರದು ಎಂಬ ದೃಷ್ಟಿಯಿಂದ ಈ ತೀರ್ಮಾನ ಕೈಗೊಳ್ಳಲಾಗಿದೆ ಎಂದು ಮುಖ್ಯಮಂತ್ರಿಗಳು ತಿಳಿಸಿದರು.

ಇನ್ನು ಮುಂದೆ  ಯಾರೂ ಬಯೋ ಡೇಟಾ ತಯಾರು ಮಾಡಬೇಕಾದ, ಪತ್ರಿಕಾ ತುಣುಕುಗಳನ್ನು ಜೋಡಿಸಿತಟ್ಟು  ತೋರಿಸುವ ಅಗತ್ಯವಿಲ್ಲ ಎಂದು ಪ್ರಶಸ್ತಿ  ಆಕಾಂಕ್ಷಿಗಳಿಗೆ ಕಿವಿ ಮಾತು ಹೇಳಿದರು.

ಕನ್ನಡ ರಾಜ್ಯೋತ್ಸವ ಪ್ರಶಸ್ತಿ ಬಹಳ ಪ್ರತಿಷ್ಠಿತವಾದ್ದದ್ದು. ಇದರ ಮೌಲ್ಯ ಹೆಚ್ಚಾಗಬೇಕಾದರೆ ಆಯ್ಕೆ ಪ್ರಕ್ರಿಯೆ ಬದಲಾಗಬೇಕು. ಮಾಡದಂಡಗಳ ಪರಿಷ್ಕರಣೆಗೆ ಅಗತ್ಯ ಕ್ರಮ ವಹಿಸಲಾಗುವುದು.

ಒಳ್ಳೆತನಕ್ಕೆ ಶಿಕ್ಷಣ ಬೇಕಾಗಿಲ್ಲ ಮನಸ್ಸು ಒಳ್ಳೆಯದಿರಬೇಕು.   ಪೌರಕಾರ್ಮಿಕರಿಗೆ  ದೊಡ್ಡ ಪ್ರಶಸ್ತಿ ನೀಡಿದರೆ ಇನ್ನೂ ಹೆಚ್ಚು ಕೆಲಸ ಮಾಡುತ್ತಾರೆ.   ಆಯ್ಕೆ ಶೋಧನೆಯಿಂದಾಗಬೇಕು ಹೊರತಾಗಿ ಅರ್ಜಿಗಳಿಂದ ಅಲ್ಲ ಎಂದರು.

ಪ್ರತಿಭೆಗೆ ವಯಸ್ಸಿನ ಗಡಿ ಮಿತಿಗಳಿಲ್ಲ:  60 ವರ್ಷದ ಮೇಲ್ಪಟ್ಟವರಿಗೆ ಪ್ರಶಸ್ತಿ ನೀಡಬೇಕೆಂದು  ಹಿಂದೆ ನ್ಯಾಯಾಲಯದಲ್ಲಿ ಅರ್ಜಿ ಸಲ್ಲಿಸಲಾಗಿದೆ. ಆದರೆ ಪ್ರತಿಭೆ ಎನ್ನುವುದು  ವಯಸ್ಸಿಗೆ ಸಂಬಂಧಿಸಿದ್ದಲ್ಲ. ತಂತ್ರಜ್ಞಾನದ ಕಾಲದಲ್ಲಿ ಅದೇಷ್ಟೋ  ಮಕ್ಕಳು ಎಷ್ಟೊಂದು ಕ್ಷೇತ್ರಗಳಲ್ಲಿ  ಪ್ರತಿಭಾವಂತರಿದ್ದಾರೆ. ಕನ್ನಡ ನಾಡಿನಲ್ಲಿ ಎಷ್ಟು  ನೀರಜ್ ಛೋಪ್ರಾ ಒಬ್ಬರಿಗೆ ಒಲಂಪಿಕ್ಸ್ ಚಿನ್ನದ  ಪದಕ ದೊರೆತಿರುವುದು ಇಡೀ ದೇಶಕ್ಕೆ ಸ್ಫೂರ್ತಿ ದೊರೆತಿದೆ ಎಂದು ಅಭಿಪ್ರಾಯ ಪಟ್ಟ ಮುಖ್ಯಮಂತ್ರಿಗಳು   ವಯಸ್ಸನ್ನು ಕಡಿಮೆ ಮಾಡುವ ಕುರಿತು ನ್ಯಾಯಾಲಯದಲ್ಲಿ ಅಫಿಡವಿಟ್ ಸಲ್ಲಿಸಿ ಅನುಮತಿ ಪಡೆಯುವ  ಕೆಲಸವನ್ನು ಮುಂದಿನ ವರ್ಷ ಮಾಡಲಿದ್ದೇವೆ ಎಂದರು.

ಹಿರಿಯರ ಜೊತೆಗೆ ವಿಶೇಷ ಪ್ರತಿಭೆಗಳನ್ನು ಗುರುತಿಸಲಾಗುವುದು ಎಂದರು.

ಕಂದಾಯ ಸಚಿವ ಆರ್ ಅಶೋಕ್,

ಕನ್ನಡ ಮತ್ತು ಸಂಸ್ಕೃತಿ ಸಚಿವ ವಿ ಸುನೀಲ್ ಕುಮಾರ್ ಮತ್ತು ಇತರರು ಸಮಾರಂಭದಲ್ಲಿ ಉಪಸ್ಥಿತರಿದ್ದರು.